مشروع مغسلة السجاد من المشاريع الخدمية الي تقدر من خلالها تحقق عائد مادي شهري جيد جدا خصوصا في المناطق الحيوية والاكثر سكانا
هنتكلم عن المشروع بكل تفاصيله من حيث
الموقع ؟ المساحه ؟ التجهيزات ؟ المعدات ؟ العماله ؟ الدعايه؟ تكاليف المشروع ؟ ارباح المشروع؟ عوامل نجاح المشروع ؟
قبل اي كلام اذكر الله في التعليقات وصل علي سيدنا النبي ﷺ
قال النبيﷺ: لا يؤمن أحدكم حتى يحب لأخيه ما يحب لنفسه
موقع المشروع :
اول حاجه هنتكلم فيها مكان او موقع المغسلة هنحتاج ناجر محل دور ارضي في مكان به كثافة سكانية عشان سرعة الانتشار ويفضل يكون قدام المحل مساحه فاضيه عشان لو هتنشر السجاد علي استاند للتجفيف خارج المحل .
مساحة المشروع :
مساحة المكان لو محل 20 متر او اكتر يكون تمام ويناسب كل احجام السجاد
يعني محل 4*5 يكون كويس او اكتر من كده حسب قدرتك .
تجهيزات المشروع :
تجهيزات المكان عمل عداد مياه ونظام صرف كويس عشان الميه متتراكمش وكمان الارضية تكون سيراميك ونبطين الحوائط سيراميك علي الاقل متر لتفادي حدوث اي ضرر من المياه ، وطبعا ابعاد مصادرالكهرباء او لوحت المفاتيح عن اي مياه .
المعدات :
نتكلم بقي عن المعدات وهي نوعين يدوي واوتوماتك
ودي ترجع لقدرتك الماليه وعامل الخبره
واكيد محدش هيفتح مغسلة سجاد اتوماتيك غير لما يكون عنده ضغط شغل ومتعاقد مع فنادق واماكن مختلفة نظرا للتكلفه العالية
المغسلة الاتوماتيك بتشتغل بمرحلتين، الأولى لغسل السجادة بأربع فُرش والثانية مرحلة نزع المسحوق وبرم السجادة، وهي متوفرة بسعر 60.000 جنيه مصري.
كمان هنحتاج ماكينة تجفيف ومنها أطوال متعددة، ولكن انصحك بشراء طول 3.5 متر لتصلح لجميع أطوال السجاد وأنواعه، وهي متاحة بسعر 35.000 جنيه مصري.
والماكينة الثالثة اختيارية، إذ يُمكنك الاستغناء عنها لحين تحقيق الأرباح ثم إضافتها للمغسلة، وهي عبارة عن ماكينة للنفض تزيل الأتربة من السجاد قبل غسله لتسهيل عملية الغسل، ومتوفرة بسعر 55.000 جنيه مصري
مغسلة سجاد يدوية
اما اساس استعرض فكرة المشروع(مغسلة السجاد اليدوي او النص اوتوماتيك )
ودي بتتكون من معدات بسيطه وفي استطاعت اي مبتدا سواء هيجيب جديد او مستعمل والتوفيق من عند الله .
اول حاجده هنحتاجها مكنسة كهربائية ودي اول متستلم السجاد بتسحب التراب من عليها ،وبعدين بتضخ المياه والمساحيق لغسل السجاد
تاني حاجه ماكينة غسيل السجاد ومنها انواع كتيره صيني وايطالي وامريكي غالبا وبتدخل بيها ع السجاده تغسلها كويس
وتالت حاجه مسدس ضخ المياه بالكمبروسل لتخليص السجاد من المساحيق بعد غسله جيداً
وبعد كده طبعا تكون عامل استاند لنشر السجاد وتجفيفه وبعد تجفيفه بتعمله بالمكنسه عشان تشفط اي تراب من عليها وتعطرها وتلفها وتجهزلها عشان العميل يستلمها ودي اخر مرحلة
وطبعا مساحيق الغسيل متوفره ف اماكن كتيره
جميع ما سبق يحتاج إلى حواليّ 20 الي 50 الف جنيه مصري فقط لبدء المشروع
العماله :
الجميل في المشروع أنه مش هيحتاج عدد كبير من العمال، ممكن ف البداية عاملين فقط ويتم تقسيم الشغل مابنهم، كمان ممكن تتفق مع عربية صغيرة او توك توك لنقل السجاد من العميل للمغسله والعكس .
الدعايه
(إِنّ اللَّهَ يُحِبّ إِذَا عَمِلَ أَحَدُكُمْ عَمَلاً أَنْ يُتْقِنَهُ)افتكر ديما قول سيدنا النبي صلي الله عليه وسلم
افضل دعايا للمكان جودة وخدمة الشغل وده هيخلي الناس هي اكبر عامل مجانا للدعايا ليك ديما في الشغل
كمان في ظل تطور العصر وسيطرة التكنولوجيا ومواقع التواصل الاجتماعي، أصبح التسويق أسهل ويصل لكل الناس داخل محافظتك من خلال النشر علي الجروبات او الاعلانات الممولة ، كمان الدعاية الورقية وتوزيعها علي الناس يوم الجمعه ، كمان تقديم عروض وخصومات ف الافتتاح واسعار خاصه للكميات وعروض شهرية متجدده .
تكاليف المشروع :
احنا اتكلمنا عن كل شئ كده غالبا ودي اجمالي التكاليف ف البداية وهتشمل الاتي
يجب وضع تكاليف أي مشروع في الحسبان قبل البدء فيه لأنها تُحدد الأرباح فيما بعد، ويتطلب المشروع دفع التكاليف التالية
تكاليف مساحيق التنظيف ودي من 500ج لحد 3000ج حسب الكميات .
تكاليف المكانس ودي من 1500 غالبا لحد 15000 الف حسب القدرة والنوعية المطلوبه.
تكاليف الآلات والمُعدات الأساسية في المشروع المسدس والكمبروسل ومكنة الغسيل ودول من 10 الاف ل 40 الف حسب النوع والحاله جديد او مستعمل .
أجور العمال والضرائب والفواتير الشهرية مثل: الكهرباء، المياه،.
تكاليف التسويق للمشروع وده ممكن كل شهر 1000 جنيه اعلانات .
المصاريف الإدارية لاستخراج تراخيص المشروع من الحي في البداية فقط
جميع ما سبق يحتاج إلى حواليّ 20 الي 50 الف جنيه مصري فقط لبدء المشروع.
ارباح المشروع :
وطبعا ده سؤال اي حد هيبدا مشروع ؟
واي تجربه قابله للنجاح او الفشل
لكن خليني اقولك متوسط ربح المشروع شهريا معاك ، الارباح هتعتمد علي التسويق وعلي عدد السجاد الي هتغسله شهريا وطبعا كل ماتستمر في المشروع هتتعرف ويجيلك ناس وعشان تقيم مشروعك مش قبل 6 شهور
متر السجاد غسيل غالبا ف حدود ال 10 جنيه:
يعني لو غسلت خمس سجاجيد يومياً بحيث تكون كل سجادة بمقاس 3 متر * 2 متر، سيكون إجمالي عدد الأمتار المغسولة 30 متر.
بحسب سعر المتر 10 جنيهات يكون الناتج اليومي 300 جنيه مصري، وبالتالي شهرياً يكون الربح 9000 جنيه مصري
قول الف محل والف كهربا والف منظفات والفين عماله يعني هيصفي معاك 4 اللاف ربح شهريا باذن الله
عوامل نجاح المشروع
لو حابب المشروع يحقق معاك نجاح اسمع الكام نصيحة دي .
اول حاجه تختار العماله الي معاك انها تكون سمعتها طيبه وبشوشين وبيتكلمو باسلوب كويس مع العملاء وطبعا الي اهم من ده كله الامانه في العمل
تاني حاجه متنتظرش العميل يجيلك لحد عندك ، ابحث واعمل دعايا لمكانك بكل الطرق الممكنه والمتاحه
تالت حاجه تختار مكان جيد للمشروع
رابع حاجه خلي سعرك ديما يناسب العميل واعمل عروض وخصومات من وقت للتاني وخليك فاكر ديما العملاء بتوعك
خامس حاجه قدم خدمه وجوده بصدق للعميل واهتم ديما انك تلتزم بموعيد تسليم السجاد ومتنساش ترش معطر علي السجاد بعد مايخلص خالص
ومش هطول عليكم اكتر من كده
اسال الله ان يفتح ليكم ابواب الرزق ولا تحرمونا من صالح دعائكم
قال النبيﷺ: المسلم أخو المسلم لا يظلمه ولا يُسْلمه، ومن كان في حاجة أخيه كان الله في حاجته، ومن فرج عن مسلم كربة فرج الله عنه كربة من كربات يوم القيامة، ومن ستر مسلما ستره الله يوم القيامة.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لو عندك اي استفسار او تعليق اكتبه وهنرد عليك
كاتب المقال : عبد الرحمن الصواف
لاتنسونا من صالح الدعاء
دمتم بخير
فديو توضيحي لكل التفاصيل ..