محل مستحضرات تجميل وعناية شخصية ولوازم كوافير من المشاريع الجميله وعليها سحب باستمرار وفيها كل يوم جديد ؛ ومفيش بيت مش بيشتري حجات يوميا او شهريا منه ؛ لكن ازاي نقدر نكون مميزين ده الي هنعرفه إن شاء الله .

ازاي نختار الموقع ؟ مساحة المحل ؟ تجهيزات المحل ؟ تشكيلة البضاعة ؟ منين نجيب الشغل ؟ التسعير ؟ ازاي نقدر نتميز ؟ ازاي نقدر نطور في الشغل ؟

لكن قبل اي كلام اذكر الله في التعليقات وصل علي سيدنا النبي ﷺ

الموضوع كتابيا لكن ف الفديو تفاصيل اكثر ..

عزيزي القارئ اسال الله لك السداد والتوفيق .

موقع المحل ؟

لازم يكون في مكان مميز ؛ حيوي ؛ زحمه ؛ وسط المدينة أو شارع عمومي أو منطقة سكنية كبيره ؛ متقلقش لو الايجار غالي لانك هتجيب الايجار وهيتبقي ربح كمان ليك إن شاء الله ..

مساحة المحل ؟

النقطة دي تختلف من شخص لآخر حسب مقدرته ورأس ماله لكن خليني اقولك اقل مساحه تبدأ بيها محل هي 2*3

؛ طبعا كل ما المساحة هتكبر هتقدر يكون عندك تشكيله اكبر

من المنتجات المختلفة ..

تجهيزات المحل ؟

خلينا هنا نعترف بحاجه إن كل لما الديكور يكون مميز هتقدر تلفت الإنتباه ؛ لكن في العادي المحل بيتعمل ك الآتي

*حوائط المحل خشب ام دي اف + رفوف خشب او زجاج

*سقف ساقط يكون فيه اضاءات كويسة + سماعات

* باب سيكوريت للمكان

*تكييف أو ستارة هواء أو مراوح حوائط

*بترينة عرض او مكتب صغير للشخص الي هيبقي ف المحل

*جهاز كمبيوتر وعليه برنامج شركات للوارد والمنصرف الخ .

*نظام كاميرات للمحل 2 كاميرا داخلي ووحده خارجي .

تشكيلة البضائع ؟

المجال مفتوح والبضاعه فيه كتيره جدا وكل يوم حجات جديدة بتنزل لكن خليني اقولك الأساسيات .

تقدر تبدأ حتي لو 3 قطع من كل نوع ..

الشامبو . البلسم .الشاور . حمام الكريم . الاسبريهات . البرفانات . الزيوت بمختلف أنواعها .بديل الزيت . كريمات شعر . كريم وجيل . الجيل . مزيلات العرق . معاجين السنان . لوشن الجسم . غسولات وش .ماسكات للبشره .كريمات بشره . الحنه . الصبغة . البروتين . الجلاد . وطبعا قسم خاص للميكب بمختلف الاصناف..

يعتبر دول أساس المحل وطبعا في عشرات الأصناف التانيه الي هتعرفها لما تدخل المجال ويطلب منك شغل..

منين نجيب شغل ؟

الأمر ده ليه جانبين .

الاول تنزل باب الشعرية وتجيب شغل من هناك محلات الجمله كلها جنب سلم المشاه هتلاقي بدل المحل عشره وكلهم جمله ..

الثاني شغل مناديب شركات وأجل لكن برشح ليك ف البدايه انك تنزل تجيب الشغل بنفسك ..

تسعير الأصناف ؟

انت معاك فواتير جملة وتبدأ تعرف اسعار السوق والمنافيسن ليك وتحط هامش الربح بتاعك ..

ازاي تقدر تتميز ؟

بمصداقيتك في البيع ولازم تقرا ويكون عندك بعض الخبره في مختلف المنتجات الي عندك لانك هتقدم نصيحة للعميل الي بيجيلك ..

ازاي نقدر نطور ف الشغل ؟

ابدا بالممكن يستسلم لك المستحيل بمجرد ما تحس ان الشغل بدأ يتحرك معاك هتبدا تضيف أصناف جديدة للمكان أو تاخد مخزن أو تبدأ توزع جمله ..

عبد الرحمن الصواف

دمتم بخير

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لو عندك اي استفسار او تعليق اكتبه وهنرد عليك

كاتب المقال : عبد الرحمن الصواف

لاتنسونا من صالح الدعاء

دمتم بخير

#اشارة

 

فديو توضيحي لكل التفاصيل ..